کیا ہو رہا ہے؟
واعظ اپنی کتاب کا اختتام اس آخری حوصلہ افزائی کے ساتھ کرتا ہے کہ جب تک ہم جوان ہیں خدا کو یاد رکھیں اور اُس کی پرستش کریں۔ بہت سوں کا ماننا ہے کہ واعظ کی کتاب کو ایک بوڑھے بادشاہ کی اُس نصیحت کے طور پر پڑھنا ہی بہتر ہے جو وہ اپنے تخت کے وارث کو دے رہا ہے۔ چنانچہ واعظ اپنے بیٹے کو تربیت دے رہا ہے کہ وہ ایک دن دانشمند بادشاہ بنے۔ جیسے ہی واعظ کی پدرانہ نصیحت اختتام کو پہنچتی ہے، وہ اپنے بیٹے کو یاد دلاتا ہے، ”اپنی جوانی کے دنوں میں اپنے خالق کو یاد کر“ (واعظ 12:1)۔ یہ ایک ایسے بیٹے کے لیے آخری تنبیہ ہے جو بےفائدہ دنیا پر حکومت کرنے کو تیار ہے۔
واعظ اپنے بیٹے سے کہتا ہے کہ اگر وہ خدا کو یاد رکھنے سے انکار کرے تو تھکاوٹ اور مایوسی کی توقع رکھے۔ اگر اُس کا بیٹا صرف اُن چیزوں پر غور کرنے کا فیصلہ کرے جو ”آفتاب کے نیچے“ ہیں، تو وہ پائے گا کہ سب کچھ بےمعنی ہے، جیسا کہ اُس کے باپ نے پایا (واعظ 12:8)۔ چنانچہ واعظ ایسی زندگی کی تصویر کھینچتا ہے جو خدا کے حوالے کے بغیر گزاری جائے۔ یہ ایک ویران قصبہ ہے۔ ایک ایسا شہر اور ایسے لوگ جو موت کے کنارے پر ہیں۔ پیداواری کام ختم ہو جاتا ہے۔ کاروبار بند ہو جاتے ہیں (واعظ 12:4)۔ کھڑکیاں بند کر دی جاتی ہیں۔ گلیوں میں گیت نہیں گائے جاتے۔ جنازے عام ہیں (12:5)۔ شہر میں اتنی خاموشی ہے کہ صرف وہی آوازیں سنائی دیتی ہیں جو کھنڈرات میں چہچہاتے پرندوں کی ہیں (واعظ 12:4ب)۔ اگر بیٹا خدا کی تعظیم کرنے سے انکار کرے، تو اُسے اُس تباہی پر حیران نہیں ہونا چاہیے جو اُس کی بادشاہی پر آئے گی۔
جو کچھ واعظ نے کہا ہے اُس سب کو ایک پینے، یعنی ایک تیز نوک والی لاٹھی کی طرح کام کرنا چاہیے، جو بیٹے کو چبھے جب وہ راستے سے بھٹک جائے (واعظ 12:11)۔ مستقبل کا یہ اندھیرا منظر اور آفتاب کے نیچے کی ساری بےفائدگی اُسے واپس مرکز کی طرف لے آنی چاہیے: کہ ”خدا سے ڈرے اور اُس کے حکموں کو مانے“ (واعظ 12:13)۔
خوشخبری کہاں ہے؟
واعظ کی پوری کتاب میں واعظ نے یہ بات واضح کی کہ زندگی کو بےمعنی بنانے والی چیز یہ بےترتیب طریقہ ہے جس سے ہماری کوششیں ہمارے اجر سے کم رہ جاتی ہیں۔ محنت سے کمائی ہوئی دولت غائب ہو جاتی ہے۔ سخت جدوجہد سے حاصل کیا ہوا انصاف بگاڑ دیا جاتا ہے۔ بڑی تلاش کے بعد پائی ہوئی حکمت وضاحت نہیں لاتی۔ نیک لوگ جوانی میں مر جاتے ہیں اور بدکار پھلتے پھولتے ہیں۔ یہ سب ہوا کی چران ہے۔
لیکن واعظ کے آخری الفاظ ہمیں یہ وجہ دیتے ہیں کہ دھوئیں اور آخرکار تباہی کی اِس دنیا میں خدا سے ڈرنا اور اُس کے حکموں کو ماننا واقعی کیوں قیمتی ہے: ”خدا ہر کام کی عدالت کرے گا... چاہے وہ نیک ہو یا بد“ (واعظ 12:14)۔
یہ واعظ کی عظیم امید ہے—اور پوری بائبل کی عظیم امید۔ یسوع عدالت کرنے آ رہا ہے۔ نئے عہدنامے کی اِن تمام آیتوں پر نظر ڈالیں جو عدالت کی ضمانت دیتی ہیں: 2 تیمتھیس 4:1، 8؛ یعقوب 5:9؛ اعمال 10:38-42، 17:31؛ 2 کرنتھیوں 5:10؛ یوحنا 5:22-30، 8:15-16، 9:39، 12:47-48؛ رومیوں 2:16، 14:10؛ مکاشفہ 19:11۔ اُن کے لیے جو خدا سے محبت رکھتے اور اُس کے حکموں کو مانتے ہیں، آنے والی تباہی ویرانی اور بربادی کی پیشین گوئی نہیں ہے، بلکہ بادشاہ کے سچے بیٹے—یسوع—کی حکومت کے تحت خدا کی بادشاہی کی جلالی بحالی ہے۔
یسوع کی بادشاہی میں، جو کچھ واعظ نے دیکھا وہ اب سچ نہ ہوگا۔ ہمارے تمام نیک کاموں کا اجر اُسی طرح ملے گا جس کے وہ مستحق ہیں (2 کرنتھیوں 5:10)۔ ہماری محنت سے کمائی ہوئی دولت غائب نہ ہوگی، کیونکہ خدا کی دولت ہماری ہو جائے گی (فلپیوں 4:19)۔ ہمارے خلاف کی گئی ساری ناانصافی آشکارا ہو جائے گی اور ہمارے دُکھوں کی داد رسی ہوگی (مکاشفہ 11:18)۔ اور جوانی میں مرنے کے بجائے، ہم ہمیشہ تک جیتے رہیں گے؛ کھنڈر میں نہیں، بلکہ خدا کے ساتھ اُس کے خوبصورت شہر میں (مکاشفہ 21:2)۔
خود دیکھیں
روح القدس آپ کی آنکھیں کھولے کہ آپ عدالت کرنے والے خدا کی خوشخبری کو دیکھ سکیں۔ اور آپ یسوع کو اُس بادشاہ کے طور پر دیکھیں جو اپنی کامل بادشاہی پر ہمیشہ حکومت اور سلطنت کرنے کے لیے آیا ہے۔

