کیا ہو رہا ہے؟
اسرائیلیوں کو خدا نے چُنا تھا کہ وہ باقی دنیا کے لیے خدا کی بھلائی اور انصاف کا نمونہ بنیں۔ لیکن اسرائیل نے اُس بلاہٹ کو چھوڑ دیا اور ایک ایسا معاشرہ بنا لیا جو ناانصافی، بدی اور خونریزی سے بھرا ہوا تھا۔ چار نبوّتوں کے ایک سلسلے میں حزقی ایل یہ دکھاتا ہے کہ اسرائیلی معاشرے کا ہر طبقہ خدا کے خلاف اپنی سرکشی کے سبب جلاوطنی کا مستحق ہے (حزقی ایل 12:1-2)۔
حزقی ایل سب سے اوپر سے شروع کرتا ہے۔ اُس کی پہلی نبوّت اسرائیل کے بادشاہ کے لیے ہے۔ نبوّتی نشانوں کے ایک سلسلے میں حزقی ایل کہتا ہے کہ بابل جلد حملہ کرے گا، بادشاہ کا سامان باندھ لے گا، اُس کی دیواریں توڑ ڈالے گا، اور اُسے بابل لے جائے گا، جہاں وہ اور اُس کے حمایتی مر جائیں گے (حزقی ایل 12:3-16)۔ ایک اَور نبوّت میں حزقی ایل کھلے چوک میں شدت سے کانپتے ہوئے کھانا کھاتا ہے (حزقی ایل 12:17-18)۔ یہ بھی ایک نشان ہے۔ جب بادشاہ اسیر کر کے لے جایا جائے گا، تو بچے ہوئے لوگ اپنا ہر کھانا پریشانی اور خوف میں کھائیں گے، کیونکہ اُن کی قوم اُن کے چاروں طرف ڈھے رہی ہو گی (حزقی ایل 12:17-20)۔
اسرائیل کے سماجی درجوں میں نیچے آتے ہوئے، حزقی ایل کی دوسری نبوّت اُن مذہبی رہنماؤں کی طرف ہے جنہوں نے جلاوطنی کے بارے میں خدا کی تنبیہوں کو رد کر دیا۔ کئی دہائیوں سے یہودی مذہبی اشرافیہ سیاسی تباہی کی ہر نبوّت کو ٹال دیتی رہی تھی (حزقی ایل 13:21-22؛ 12:26-27)۔ اِسی دوران اسرائیل میں بااثر عورتیں جادوئی تعویذ بیچ رہی تھیں جو آنے والی ہر تباہی کو روکنے کا وعدہ کرتے تھے (حزقی ایل 13:17-20)۔ حزقی ایل کے برعکس، یہ مذہبی رہنما اور بااثر عورتیں اسرائیل کی بڑھتی ہوئی بدچلنی اور بدعنوانی کے باوجود مسلسل اسرائیل میں سلامتی کی نبوّت کرتے رہے (حزقی ایل 13:10، 22)۔ لیکن خدا کہتا ہے کہ یہ سب مفروضے جلد ہی غلط ثابت ہوں گے (حزقی ایل 12:13-15، 18)۔ اسرائیل کے نبی جھوٹے ہیں (حزقی ایل 13:1-7، 19، 23)۔ جھوٹی سلامتی کی جو نبوّتیں اُنہوں نے بیچی ہیں وہ ایک گلتی ہوئی دیوار پر گچ کی تہہ چڑھانے سے بہتر نہیں (حزقی ایل 13:10)۔ خدا کہتا ہے کہ وہ اُن کے جھوٹے نبوّتی بیانوں کو بابل کی تلواروں سے چھید ڈالے گا اور خود یقینی بنائے گا کہ وہ آنے والی جلاوطنی میں زندہ نہ بچیں (حزقی ایل 13:8-16)
معاشرے کے نچلے حصے کے قریب، حزقی ایل کی تیسری نبوّت اسرائیل کے ریاکار خاندانی سرداروں کے لیے ہے۔ اگرچہ وہ بار بار خدا سے مشورہ مانگنے کا دکھاوا کرتے ہیں، لیکن اُن میں سے اکثر خدا کی رائے صرف اُس وقت پوچھتے ہیں جب وہ پہلے ہی دوسرے دیوتاؤں سے مشورہ لے چکے ہوتے ہیں۔ حزقی ایل کہتا ہے کہ ایسا کرنے سے اُنہوں نے اُس خدا کے سوا، جس نے اُنہیں چُنا تھا، اَور ہستیوں کو "اپنے دل دے دیے" ہیں (حزقی ایل 14:1-3)۔ حزقی ایل اُن کی ملی جلی روحانیت کی مذمت کرتا ہے، اِس امید کے ساتھ کہ وہ اسرائیل کے دلوں کو اُس خدا کی طرف واپس جیت لے جس نے اُنہیں چُنا تھا (حزقی ایل 14:4-6)۔ اگر اسرائیل کے خاندانی سردار اپنی ریاکاری چھوڑنے سے انکار کریں، تو حزقی ایل کہتا ہے کہ خدا اُنہیں اور اُن نبیوں کو بھی ہلاک کرے گا جو اُنہیں جواب دینے کا ڈھونگ رچاتے ہیں (حزقی ایل 14:7-11)۔
آخر میں، حزقی ایل اسرائیل کے عام باشندے سے مخاطب ہوتا ہے جس نے اپنے رہنماؤں کے بُرے نمونے کی پیروی کی ہے۔ اُن کے رہنماؤں نے لوگوں کو اِس قدر زہرآلود کر دیا ہے کہ کوئی باقی نہیں رہا جو قومی تباہی اور جلاوطنی کے سیلاب کو روک سکے (حزقی ایل 14:12-20)۔ جلد ہی بابل چڑھ آئے گا اور اسرائیل سے بدی کو جڑ سے اُکھاڑ دے گا۔ اگرچہ کچھ لوگ بچ جائیں گے، لیکن حزقی ایل کہتا ہے کہ وہ اپنی بُری ہٹ دھرمی میں قائم رہیں گے اور دنیا کے سامنے ثابت کریں گے کہ اسرائیل اپنی جلاوطنی کا مستحق تھا (حزقی ایل 14:21-23)۔ اوپر سے نیچے تک اسرائیل بدعنوان ہے، اور خدا حق پر ہے کہ اِس بُری بادشاہی کو تباہ کرے اور اُسے جلاوطنی میں بھیج دے۔
خوشخبری کہاں ہے؟
اسرائیل میں کوئی باقی نہیں رہا جو اُن کی آنے والی جلاوطنی کو روک سکے۔ بادشاہ سے لے کر اُس کی رعایا تک، سب بدعنوان ہیں۔ لیکن حزقی ایل کی نبوّتوں کا مقصد توبہ پیدا کرنا ہے۔ حزقی ایل صرف یہ نبوّت کر رہا ہے کہ اگر اسرائیل اپنی راہ نہ بدلے تو کیا ہو گا۔ افسوس کہ اسرائیل نے توبہ نہ کی، اور جیسا اُس نے نبوّت کی تھی، بابل نے اُسے تباہ کر دیا۔
آخرکار خدا نے ایک اَور نبی بھیجا تاکہ اوپر سے نیچے تک اسرائیلی معاشرے کی بدعنوانی کو ظاہر کرے، اور اُس کا نام یسوع تھا۔ یسوع نے دعویٰ کیا کہ وہ روم کی بادشاہی سے بڑھ کر ایک اعلیٰ بادشاہی کا بادشاہ ہے (یوحنا 18:36-37)۔ اور یسوع نے اپنے زمانے کے مذہبی رہنماؤں سے کہا کہ خدا نے اُسے اُن کی عدالت کرنے کے لیے بھیجا ہے (یوحنا 9:39-41)۔ اپنی پوری خدمت کے دوران یسوع نے اسرائیل کے مذہبی رہنماؤں کو اُن کی ریاکاری، ناانصافی اور سخت دلی پر ملامت کی۔ حزقی ایل کی طرح، وہ اُنہیں گچ پھری ہوئی قبریں کہتا ہے جو باہر سے خوبصورت دکھتی ہیں لیکن اندر اُن لوگوں کی ہڈیوں سے بھری ہیں جن پر اُنہوں نے ظلم کیا (متی 23:27-28)۔ اور اسرائیل کے عام باشندے سے یسوع کہتا ہے کہ وہ سلامتی کا جھوٹا بیان لانے نہیں آیا بلکہ ایک تلوار لانے آیا ہے جو بُرے باپوں کو اُن کے وفادار بیٹوں سے اور نیک ماؤں کو اُن کی بُری بیٹیوں سے جدا کر دے گی (متی 10:34-36)۔ حزقی ایل نے نبوّت کی کہ اسرائیل کی بدی اُن کی قوم کی تباہی کا باعث بنے گی، لیکن یسوع نے اِس سے بھی زیادہ ہولناک بات کی نبوّت کی۔ اُس نے خدا اور اُس کے مُلک سے ایک ایسی جلاوطنی کی تنبیہ دی جو ہر اُس شخص کے لیے موت کے بعد بھی جاری رہے گی جو اپنی بدی پر قائم رہتا ہے (لوقا 16:23)۔
حزقی ایل اور یسوع کی نبوّتیں دکھاتی ہیں کہ ہم جلاوطنی کے مستحق ہیں، لیکن یہ ناگزیر انجام نہیں ہیں۔ جب ہم یسوع سے یہ کڑی تنبیہیں سنتے ہیں، تو یہ رحمتیں ہیں جو ہماری توبہ پیدا کرنے کے لیے دی گئی ہیں۔ جب ہم توبہ کرتے ہیں اور اپنے دل یسوع کو دے دیتے ہیں، تو وہ ہمیں بدی سے پاک کرتا ہے اور ہماری سرکشی کو نیست کر دیتا ہے۔ اپنے فضل میں وہ ہمارے ماضی کو معاف کرے گا، اور اپنی رحمت میں وہ ہمیں جلاوطنی سے بچائے گا تاکہ ہم ایسی اُمّت بنیں جو دنیا کے سامنے خدا کی بھلائی اور انصاف کو ظاہر کرے۔ شکر ہے کہ خدا کا اُنہیں جلاوطن کرنے کا فیصلہ جو اُسے رد کرتے ہیں، ہمیشہ دھیمے قدموں سے آتا ہے۔ اور خدا صبر سے انتظار کر رہا ہے تاکہ سرکش لوگوں کو اُس کا پیغام سننے کا وقت ملے۔ خدا نہیں چاہتا کہ اُس کے لوگوں میں سے کوئی بھی اُس سے جدا ہو۔ اِسی لیے وہ حزقی ایل اور یسوع جیسے نبیوں کے ذریعے تنبیہ کرتا ہے (2 پطرس 3:9)۔ پس یسوع کی تنبیہ سنیں، توبہ کریں، اور آپ آنے والی جلاوطنی سے بچائے جائیں گے۔
خود دیکھیں
میری دعا ہے کہ روحُ القدس آپ کی آنکھیں کھولے تاکہ آپ اُس خدا کو دیکھیں جو انسانی بدعنوانی اور بدی کو اپنی دنیا سے جلاوطن کر کے لازماً تباہ کرے گا۔ اور آپ یسوع کو اُس ہستی کے طور پر دیکھیں جو ہمیں بدی سے پاک کرتا ہے اور ہمیں اپنی اُمّت بناتا ہے۔

