کیا ہو رہا ہے؟
حزقی ایل اسرائیل کے حاکموں پر یہ الزام لگاتا ہے کہ اُنہوں نے اُن لوگوں کا استحصال کیا جو اُن کی نگرانی میں سونپے گئے تھے، اور وہی اسرائیل کی جلاوطنی کا سبب بنے۔ خاص بات یہ ہے کہ یہ باب اِن حاکموں کو ”چرواہے“ کہتا ہے۔ اسرائیل کا پہلا بادشاہ، داؤد، تخت پر بیٹھنے سے پہلے ایک چرواہا تھا (2 سموئیل 5:2)۔ خدا نے اُس سے اور آنے والے سب بادشاہوں سے کہا کہ وہ خدا کے لوگوں پر ایسی حکومت کریں جیسے ایک چرواہا نرمی سے اپنے گلّے کی دیکھ بھال کرتا ہے۔ لیکن حزقی ایل کے زمانے میں یہ چرواہے خود درندے بن چکے تھے۔ حزقی ایل اِن بُرے حاکموں کو خبردار کرتا ہے کہ خدا آ رہا ہے تاکہ اپنے گلّے کو اُن کے ہاتھ سے چھڑائے اور اُس کے لوگ دوبارہ اُس کے ساتھ رہ سکیں۔
حزقی ایل پہلے تفصیل سے بتاتا ہے کہ اسرائیل کے حاکموں نے کیا کیا ہے اور خدا اُن کے جرائم کا کیا جواب دے گا۔ وہ لوگوں کو بت پرستی کی طرف لے گئے، اُنہوں نے نظرانداز کیے ہوئے لوگوں کی دیکھ بھال سے انکار کیا، اور اُنہیں غیر ملکی فوجوں سے محفوظ نہ رکھا۔ چونکہ اُنہوں نے اپنے عہدے کو لوگوں کی خدمت کے بجائے اُن کے استحصال کے لیے استعمال کیا، اِس لیے خدا اِن بدعنوان حاکموں کو ہٹا دے گا اور اپنے مظلوم لوگوں کو چھڑائے گا (حزقی ایل 34:1-10)۔ پھر خدا خود آگے بڑھ کر وہ اچھا چرواہا بنے گا جس کی اُس کے لوگوں کو ضرورت ہے۔ وہ نظرانداز کیے ہوئے لوگوں کی دیکھ بھال کرے گا اور اُنہیں جمع کرے گا جو جلاوطنی میں تتر بتر ہو گئے ہیں (حزقی ایل 34:11-16)۔
تاہم بُرے حاکموں کا مسئلہ ہی واحد مشکل نہ تھی جس کا سامنا خدا کے گلّے کو تھا۔ حزقی ایل معاشرے کے دولت مند طبقے کو بھی ایسے ہی جرائم پر للکارتا ہے۔ اِس اشرافیہ نے اپنا پیٹ بھرنے کے لیے غریبوں کو لوٹا ہے۔ حزقی ایل اُنہیں ایسی خودغرض بھیڑوں سے تشبیہ دیتا ہے جو تھوڑی سی خوراک پر لڑتی ہیں اور ندیوں کو گدلا کر دیتی ہیں تاکہ نیچے کی طرف والے پانی نہ پی سکیں (حزقی ایل 34:17-19)۔ لیکن اِس دولت مند طبقے کے ستائے ہوئے لوگوں کے لیے امید ہے۔ حزقی ایل کہتا ہے کہ خدا ایک نیا داؤد بھیجے گا، ایک چرواہا بادشاہ، تاکہ وہ دولت مند بھیڑوں اور غریب بھیڑوں کے درمیان برابری قائم کرے (حزقی ایل 34:20-24)۔ یہ نیا داؤد اسرائیل کو خدا کے ساتھ ملائے گا اور یقینی بنائے گا کہ اُس کے لوگ اپنے وطن میں سرسبز و شاداب رہیں (حزقی ایل 34:25-27)۔ خدا کے چُنے ہوئے چرواہا بادشاہ کے ماتحت اُس کے لوگ جلاوطنی اور بُری قیادت کا دُکھ نہ سہیں گے بلکہ ایک فراوانی کے مُلک میں ہمیشہ کے لیے خدا کی نزدیکی کا لطف اُٹھائیں گے (حزقی ایل 34:28-31)۔
خوشخبری کہاں ہے؟
بدعنوان چرواہوں اور بُری بھیڑوں کا مسئلہ اسرائیل کے حاکموں کے ساتھ ختم نہ ہوا۔ داؤد کے خاندان کی ہر پُشت اُس برابری اور دیکھ بھال کو فراہم کرنے میں ناکام رہی جس کی اسرائیل کو ضرورت تھی۔ لیکن خدا نے وعدہ کیا کہ وہ خود اپنے لوگوں کی چرواہی کرے گا اور ایک نیا داؤد بھیجے گا جو اُنہیں اُس کے پاس اور اُن کے شادابی سے بھرے وطن میں واپس لائے گا۔ وہ نیا داؤد یسوع ہے۔
یسوع داؤد کی نسل سے ہے، اور وہی اچھا چرواہا ہے جس کی حزقی ایل امید کرتا تھا۔ خدا نے یسوع کو بھیجا تاکہ وہ اُس کے کمزور اور زخمی گلّے کی دیکھ بھال کرے۔ یسوع نے اپنے زمانے کی مذہبی اشرافیہ کو ملامت کی کیونکہ وہ خدا کے گلّے کی خدمت کرنے کے بجائے اُس کا استحصال کرتے تھے (لوقا 11:37-46؛ مرقس 11:17)۔ اُس نے دبے کچلے لوگوں سے کہا کہ وہ اُن کی خدمت کرنے اور اُن کا چرواہا بننے آیا ہے (متی 20:28؛ یوحنا 10:14-15)۔ جس طرح ایک اچھا چرواہا اپنی بھیڑوں کے زخموں کی دیکھ بھال کرتا ہے اور کھوئی ہوئی بھیڑ کو ڈھونڈتا ہے، اُسی طرح یسوع جہاں بھی گیا اُس نے بیماروں کو شفا دی اور دھتکارے ہوئے لوگوں کو قبول کیا۔ اور ایک اچھے چرواہے کی طرح، یسوع نے اپنی بھیڑوں کی حفاظت کے لیے اپنی جان دے دی (یوحنا 10:11)۔ جب ایک باغ میں دشمنوں نے یسوع اور اُس کے پیروکاروں کو گھیر لیا، تو یسوع نے اپنے آپ کو پکڑوا دیا تاکہ اُس کے دوست بچ نکلیں (یوحنا 18:8-9)۔ وہ بدعنوان چرواہوں کے ہاتھوں قتل کیا گیا، لیکن وہ قبر سے جی اُٹھا۔ بہت پہلے سموئیل کی کتاب میں خدا نے داؤد سے وعدہ کیا تھا کہ اُس کے بیٹوں میں سے ایک ہمیشہ کے لیے انصاف سے حکومت کرے گا (2 سموئیل 7:1-16)۔ یسوع داؤد کا وہی وعدہ کیا گیا بیٹا اور خدا کے لوگوں کا ابدی چرواہا ہے۔ یسوع ہی وہ بادشاہ اور چرواہا دونوں ہے جو اپنے لوگوں کی راہنمائی کرتا ہے اور اُنہیں خدا کے پاس بحال کرتا ہے تاکہ وہ ہمیشہ اُس کے ساتھ رہ سکیں (مکاشفہ 7:17)۔
خود دیکھیں
میری دعا ہے کہ روح القدس آپ کی آنکھیں کھولے تاکہ آپ اُس خدا کو دیکھ سکیں جو اپنے لوگوں کی ایسی دیکھ بھال کرتا ہے جیسے ایک چرواہا اپنی بھیڑوں کی کرتا ہے۔ اور آپ یسوع کو اُس اچھے چرواہے کے طور پر دیکھیں جس نے اپنے لوگوں کے لیے اپنی جان دے دی تاکہ وہ زندگی پائیں۔

