کیا ہو رہا ہے؟
یوحنا ایک رویا میں شیطان کے انجام اور خود موت کی موت کو دیکھتا ہے۔ شیطان، جسے اژدہا یا سانپ کہا گیا ہے، ایک طویل عرصے سے دُنیا کے فریب دینے والے اور الزام لگانے والے کے عہدے پر قائم رہا ہے۔ دُنیا کی قومیں اُس کے اختیار کے نیچے جکڑی ہوئی تھیں، اور فریب کھا کر خدا تعالیٰ کے سوا دوسری قوتوں اور معبودوں کی پرستش کرتی تھیں۔ اِن قوتوں نے انسانیت کو قبر میں کھینچ لیا، جہاں موت نے خدا کے وفادار لوگوں کو بھی قید میں رکھا ہوا تھا۔ لیکن، جیسا کہ یوحنا پہلے بھی دیکھ چکا تھا، وہ اب یہ مشاہدہ کرتا ہے کہ آسمان پر بادشاہوں کے بادشاہ کے طور پر یِسوع کا تخت نشین ہونا کیسے شیطان اور موت کو اُن کے اختیار سے معزول کر دیتا ہے۔ ایک فرشتہ شیطان کو باندھ کر اتھاہ گڑھے میں بند کرتا اور اُس پر مہر لگا دیتا ہے — یہ ابتری کا ایک قید خانہ ہے جو گہرے پانیوں سے تعلق رکھتا ہے، آسمان کے تختوں سے بہت دُور (مکاشفہ 20:1-3الف)۔
اب یِسوع ہر بادشاہ سے بالاتر بادشاہ کے طور پر حکومت کرتا ہے، اور قوموں کا فریب دینے والا اتھاہ گڑھے میں زنجیروں میں جکڑا ہوا ہے۔ چنانچہ وہ قوتیں اور معبود جن کی پرستش قومیں ایک طویل عرصے سے کرتی آئی تھیں، اپنا اختیار کھونے لگتے ہیں۔ اپنی آبی قید سے شیطان اب قوموں کو فریب دے کر اُنہیں کائنات کے سچے بادشاہ کی پرستش سے روک نہیں سکتا۔ شیطان نے قوموں پر اپنا قابو کھو دیا ہے اور وہ اُس کی گرفت سے نکل رہی ہیں، کیونکہ لوگ اپنے معبودوں سے پھر کر مسیح کی بادشاہی میں شامل ہو رہے ہیں (مکاشفہ 20:3ب)۔ قوموں کے تخت، جن پر کبھی بدروحی قوتیں بیٹھی تھیں، اب خالی کر دیے گئے ہیں، اور یِسوع اپنے وفادار پیروکاروں کو اِن خالی تختوں پر بٹھا کر اُن پر حکومت کرتا ہے (مکاشفہ 20:4)۔ یوحنا بدروحوں کی اِس معزولی اور اپنے لوگوں کی تخت نشینی کو پہلی قیامت کہتا ہے (مکاشفہ 20:5)۔ جو لوگ بدروحی بادشاہتوں کے نیچے شہید کیے گئے، وہ مسیح میں اُٹھ کر اُن ہی بادشاہتوں پر حکومت کرتے ہیں جنہوں نے اُنہیں قتل کیا تھا۔ مسیح اور اُس کے مُقدّسوں کی یہ حکومت شیطان کی حتمی شکست تک جاری رہے گی۔ یوحنا دیکھتا ہے کہ یِسوع اپنے مُقدّسوں کے ساتھ ہزار برس حکومت کرے گا — یہ اِس بات کا اشارہ ہے کہ یہ بادشاہی اُس وقت تک حکومت کرے گی جب تک سب کچھ پورا نہ ہو جائے (مکاشفہ 20:6)۔ اور جب یہ کام پورا ہو جائے گا، تو شیطان اور موت ہمیشہ کے لیے ہلاک کر دیے جائیں گے (مکاشفہ 20:7الف)۔
یِسوع کی حکومت بالآخر ایک آخری جنگ کی طرف لے جاتی ہے، جہاں شیطان کو کھول دیا جاتا ہے تاکہ وہ خدا کے لوگوں کے قدیم دشمنوں کو اُس کی بادشاہی کے خلاف لڑنے کے لیے جمع کرے۔ یوحنا دیکھتا ہے کہ شیطان جوج اور ماجوج کی قوموں کو فریب دے رہا ہے، جنہیں یِسوع کی حکومت نے زمین کے دُور دراز کونوں میں دھکیل دیا تھا (مکاشفہ 20:7ب)۔ یہ موت کے بندھن میں جکڑی قوموں کے وہ بدروح گرفتہ حاکم ہیں جو ایک طویل عرصے سے یِسوع کی حکومت کی مخالفت کرتے آئے ہیں (حزقی ایل 38-39)۔ جیسا کہ وہ خدا کے لوگوں کی پوری تاریخ میں کرتے آئے ہیں، شریر قومیں اُس کے شہر کو تباہ کرنے کے لیے اُسے گھیر لیتی ہیں۔ ماضی میں شریر قوموں نے خدا کے شہر کو اُس کی زناکارانہ روشوں کے سبب سے جلایا تھا۔ لیکن اِس بار یہ شہر وہ کسبی نہیں ہے جسے یوحنا نے پہلے دیکھا تھا۔ بلکہ یہ وہ شہر ہے جس سے یِسوع محبت رکھتا ہے — مسیح کی دُلہن۔ پس آگ شہر پر نہیں، بلکہ اُس پر حملہ کرنے والوں پر آتی ہے (مکاشفہ 20:8-9)۔ جب اُس کا لشکر جل کر مٹ جاتا ہے، تو خود شیطان اُس مہلک آگ میں ڈال دیا جاتا ہے جو خدا نے اُس کے لیے تیار کی تھی (مکاشفہ 20:10)۔
پھر یوحنا دیکھتا ہے کہ یِسوع اپنی خلقت کو نیا کرنے کی تیاری کرتا ہے۔ یِسوع کا تخت ظاہر کیا جاتا ہے۔ اب کوئی چیز اُس کی حضوری کو خلقت سے نہ چھپاتی ہے نہ درمیان میں حائل ہوتی ہے۔ چنانچہ سب کچھ دیکھنے والے بادشاہ کی آنکھوں سے کوئی چیز چھپی نہیں رہتی۔ آسمان اور زمین بھی بھاگ جاتے ہیں، اور خلقت اور اُس کے خدا کے درمیان کچھ باقی نہیں رہتا۔ پھر، سب چیزوں کو ویسا ہی دیکھ کر جیسی وہ ہیں، یِسوع بادشاہ اپنی بادشاہی کو از سرِ نو ترتیب دینا شروع کرتا ہے۔ جس طرح اُس نے ابتدا میں اپنے کلام کے ذریعے خلقت کو ترتیب دیا تھا، اُسی طرح یِسوع ایک بار پھر کلام ہی سے اپنی بادشاہی کو ترتیب دیتا ہے۔ کتابیں کھولی جاتی ہیں، جو ہر ایک کے ہر عمل کو ظاہر کر دیتی ہیں۔ اِن کلمات کے ذریعے یِسوع اپنی نئی کی ہوئی زندگی کی دُنیا میں ترتیب قائم کرتا ہے — اور ہر اُس چیز کو جو موت کے ساتھ ہم آہنگ ہے، ایک آخری موت کے حوالے کر دیتا ہے۔ آخری اور عروجی مرحلے میں، یِسوع خود موت کے اختیار اور اُس قبر کو، جس نے مُردوں کو تھام رکھا تھا، اُن کی اپنی موت کے سپرد کر دیتا ہے۔ وہ موت اور قبر کو اُن تمام جانوں سے خالی کر دیتا ہے جو اُنہوں نے تھام رکھی تھیں، اور اُنہیں خالی حالت میں اُسی موت میں بھیج دیتا ہے جو شیطان کے لیے تیار کی گئی تھی۔ آخرکار، وہ سب چیزیں جو اُن کی مہلک صفوں میں شامل ہوئیں، اُن کے مہلک انجام میں بھی اُن کے ساتھ شامل ہو جاتی ہیں۔
خوشخبری کہاں ہے؟
یِسوع زندگی کی اپنی بادشاہی کے آنے کا اعلان کرتا ہوا آیا، جس کا مطلب موت کی ہر بادشاہی کی شکست تھا۔ شیطان کے فریب کے نیچے، زمین کی بادشاہتیں بدروح گرفتہ قوتوں کی پرستش کرتی تھیں اور اُنہیں آزاد کیے جانے کی ضرورت تھی۔ یِسوع اِن سلطنتوں پر اپنی قدرت ظاہر کرتا ہے جب وہ اپنے 72 پیروکاروں کو اپنی بادشاہی کا اعلان کرنے کے لیے بھیجتا ہے، ہر قوم کے لیے ایک (لوقا 10:1؛ پیدائش 10؛ استثنا 32:8)۔ اُس کے پیروکار خبر دیتے ہیں کہ جب وہ اپنے علاقوں میں یِسوع کی حکومت پھیلا رہے تھے تو وہ قوتیں اور معبود اُن کے تابع ہو گئے (لوقا 10:17)۔ یِسوع اِس ہونے والی فتح پر زور دیتے ہوئے کہتا ہے کہ اُس نے شیطان کو آسمان سے گرتے دیکھا (لوقا 10:18)۔ یِسوع اپنے وفادار پیروکاروں کو شریک بنا کر اپنی بادشاہی پھیلاتا ہے تاکہ بُری قوتوں کو معزول کریں اور اُس کے ساتھ خلقت پر حکومت کریں (افسیوں 1:3، 2:6)۔
جس طرح اُس کے پیروکاروں نے قوتوں کو معزول کرنے کے لیے دشمن کے علاقے میں دھاوا بولا، اُسی طرح یِسوع نے موت کے اختیار کو معزول کرنے کے لیے موت کے دشمن علاقے میں دھاوا بولا۔ صلیب پر، یِسوع نے شیطان کی بادشاہی اور موت کی قوت کو اُس کے اپنے علاقے میں داخل ہو کر مغلوب کیا۔ ابتدا میں، شیطان نے خدا کو اُس کے شہریوں سے محروم کر کے اُس کی بادشاہی پر قبضہ کرنے کی کوشش کی تھی (پیدائش 3:1)۔ لیکن اپنے جی اُٹھنے، آسمان پر اُٹھائے جانے، اور اپنے ظہور کے وقت یِسوع موت کو اُس کے شہریوں سے محروم کر دیتا ہے۔ شیطان نے بھلے باغ کو خالی کر دیا ہو، لیکن یِسوع قبر کو خالی کر دے گا۔
یِسوع کی ہزار سالہ بادشاہی ابھی اِس وقت کارفرما ہے۔ اپنے وفادار پیروکاروں کے ذریعے، یِسوع تاریکی کے آخری اور بھاگتے ہوئے قلعوں کو دُنیا کے کناروں کی طرف دھکیل رہا ہے۔ چونکہ شیطان تاریکی میں باندھا اور زنجیروں میں جکڑا ہوا ہے، اِس لیے جن بادشاہتوں کو اُس نے فریب دیا تھا اُن کے تخت اپنی بدروح گرفتہ قوتوں سے خالی کیے جا رہے ہیں اور حکومت کرنے والے مُقدّسوں سے بھرے جا رہے ہیں۔ جس طرح یِسوع نے 72 کو قوموں میں بھیجا، اُسی طرح اب وہ ہمیں اپنی کلیسیا کے طور پر زمین کے ہر کونے میں بھیجتا ہے (متی 28:18-20)۔ پولس رسول ہمیں بتاتا ہے کہ ہماری لڑائی اُن ہی رُوحانی قوتوں کے خلاف ہے جو آسمانی مقاموں میں حکومت کرتی ہیں۔ جس طرح یِسوع اپنے کلام سے ترتیب قائم کرتا ہے، اُسی طرح ہم خدا کے کلام، رُوح کی تلوار، اور بادشاہ یِسوع کی قدرت کے ذریعے ترتیب قائم کرتے ہیں — وہ جو سب تختوں سے بالاتر تخت پر حکومت کر رہا ہے (افسیوں 6:12، 17)۔
یہی وہ تخت ہے جو ظاہر کیا جائے گا اور جو سب کچھ ظاہر کر دے گا۔ جب ساری خلقت اور اُس کے خالق کے درمیان کوئی چیز حائل نہ رہے گی، تو وہ سب جو یِسوع اور زندگی کی اُس کی بادشاہی کے ساتھ ہم آہنگ ہیں، ہمیشہ تک اُس کے ساتھ جیئیں گے۔ کیونکہ موت کے ساتھ ہم آہنگ ہر طاقت اور ہر قوت ایک آخری ہلاکت کے حوالے کر دی جائے گی۔ ایک بھی تخت یا قلعہ موت کے قبضے میں نہ رہے گا (1 کرنتھیوں 15:24-26)۔ ہر علاقے کا ہر انچ بادشاہ یِسوع اور اُس کے وفادار پیروکاروں کی زندگی بخش حکومت کے نیچے ہو گا۔
خود دیکھیں
میری دُعا ہے کہ رُوحُ القُدس آپ کی آنکھیں کھولے تاکہ آپ اُس خدا کو دیکھ سکیں جو شیطان اور قبر کو معزول کرے گا، اور اپنے لوگوں کو اُن کے اختیار سے چھڑائے گا۔ اور آپ یِسوع کو سب بادشاہوں سے بالاتر بادشاہ کے طور پر دیکھیں، جو زندگی کی اپنی نئی بادشاہی لا رہا ہے اور اُسے وفادار شہریوں سے بھر رہا ہے۔

