کیا ہو رہا ہے؟
قربانیوں کی تفصیل بیان ہو چکی ہے۔ کاہن مخصوص کیے جا چکے ہیں۔ خدا نے خیمۂ اجتماع کو اپنی حضوری سے بھر دیا ہے۔ اب خدا باقی اسرائیل کی طرف متوجہ ہوتا ہے اور اُنہیں سکھاتا ہے کہ وہ دنیا میں اُس کی مُقدّس قوم کے طور پر کیسے زندگی گزاریں۔ اگر کاہنوں کو ویسا ہی مُقدّس ہونا ہے جیسا خدا مُقدّس ہے، تو پوری قوم کو بھی ایسا ہی ہونا چاہیے۔
احبار 11 پاک اور ناپاک جانوروں کی اقسام مقرر کرتا ہے۔ یہ اخلاقی اقسام نہیں ہیں۔ ناپاک ہونے کا مطلب گنہگار ہونا نہیں ہے۔ اِس کا سادہ مطلب یہ ہے کہ کوئی چیز خدا کی مُقدّس حضوری کے لیے موزوں نہیں۔ پاک ہونے کا مطلب ہے کہ وہ چیز مکمل ہے، صحیح ترتیب میں ہے، اور خدا کے حضور میں رہنے کے قابل ہے۔
اِن اقسام کے پیچھے دلیل حیاتیاتی نہیں بلکہ علامتی ہے۔ پاک چیزیں کاملیت، یکجائی اور زندگی کی نمائندگی کرتی ہیں۔ ناپاک چیزیں ٹوٹ پھوٹ، ملاوٹ یا بے ترتیبی کی نمائندگی کرتی ہیں۔ مثال کے طور پر، جو جانور پاک سمجھے جاتے ہیں وہ جُگالی بھی کرتے ہیں اور اُن کے کُھر بھی چِرے ہوئے ہوتے ہیں۔ یہی متوقع نمونہ ہے۔ جب کسی جانور میں ایک بات ہو مگر دوسری نہ ہو—جیسے وہ جُگالی کرتا ہو مگر اُس کا کُھر چِرا ہوا نہ ہو—تو وہ ناپاک ہے۔ مچھلیوں کا بھی یہی حال ہے۔ پاک مچھلیوں کے پَر اور چھلکے دونوں ہوتے ہیں۔ لیکن اگر کسی مچھلی کے چھلکے ہوں مگر پَر نہ ہوں، یا پَر ہوں مگر چھلکے نہ ہوں، تو نمونہ ٹوٹ جاتا ہے، اور وہ مچھلی ناپاک ہے۔
اسرائیل کی خوراک خدا کی قدوسیت کی روزانہ تصویر ہونی تھی۔ جیسے خدا مکمل، یکجا اور کامل طور پر مخصوص ہے، ویسے ہی اُس کے لوگوں کو بھی مکمل، یکجا اور قوموں سے الگ یعنی مخصوص ہونا چاہیے۔ صرف پاک چیزیں کھانے سے اسرائیل نے دنیا کو دکھایا کہ اُن کا خدا سب سے جدا ہے۔ سادہ ترین معنوں میں: خدا مُقدّس ہے، اِس لیے اُس کے لوگوں کو بھی مُقدّس ہونا چاہیے (احبار 11:44-45)۔
زندگی گزارنے کا یہ طریقہ خود انسانیت کی بھی ایک تصویر تھا۔ قومیں خدا کی صورت پر پیدا کی گئی تھیں، لیکن وہ اُس کی صورت کے حاملوں کی طرح زندگی نہیں گزارتی تھیں۔ اُن مچھلیوں کی طرح جن کے پَر ہوں مگر چھلکے نہ ہوں، اُنہوں نے اُس نمونے کو توڑ دیا جس کے مطابق اُنہیں ہونا چاہیے تھا۔ اِس کے برعکس، اسرائیل کو ایک بحال شدہ انسانیت ہونا تھا، جو قوموں کے سامنے خدا کی قدوسیت کو مجسم کرنے کے لیے مخصوص کی گئی تھی۔
خوشخبری کہاں ہے؟
یسوع اُس قدوسیت کو اپنے وجود میں مجسم کر کے اِن شریعتوں کو پورا کرتا ہے جس کی وہ علامت تھیں۔ وہ نہ منقسم ہے نہ بے ترتیب۔ وہ خدا کی سچی اور کامل صورت ہے (کلسیوں 1:15)۔ اُس میں کوئی کمی نہیں، کوئی ٹوٹ نہیں، کوئی تضاد نہیں—صرف بےنقص کاملیت اور قدوسیت ہے۔
یسوع نے خود اُس حقیقت کی وضاحت کی جس کی طرف خوراک کی شریعتیں اشارہ کرتی تھیں۔ متی 15:11 میں وہ کہتا ہے، ”جو منہ میں جاتا ہے وہ آدمی کو ناپاک نہیں کرتا، بلکہ جو منہ سے نکلتا ہے۔“ پاک خوراک کھانا کسی کو حقیقتاً پاک نہیں بنا سکتا تھا۔ لوگ خدا کی صورت پر بنائے گئے تھے، اور اُنہیں اپنی باتوں اور اعمال میں خدا کو ظاہر کرنا تھا۔ لیکن اُن کی باتیں اور اعمال بگڑے ہوئے تھے، خواہ اُن کی خوراک میں کتنی ہی احتیاط ہوتی۔ خدا کو بنیادی طور پر اِس سے سروکار نہیں کہ ہم کیا کھاتے ہیں، بلکہ اِس سے کہ ہم کیسے جیتے ہیں۔ وہ چاہتا ہے کہ ہم اپنی زندگیوں میں مخصوص ہوں، نہ صرف اپنی خوراک میں۔
پھر اعمال 10 ہمیں قوموں کے لیے خوراک کی شریعتوں کا وسیع تر مطلب دکھاتا ہے۔ اسرائیل کی پاک خوراک اُن کی قوموں سے جدائی کی علامت تھی، جو اُس خدا کو ظاہر کرنے میں ناکام رہیں جس کی صورت پر وہ پیدا کی گئی تھیں۔ لیکن یسوع کے وسیلے سے خدا فرماتا ہے، ”جسے خدا نے پاک کیا ہے، اُسے حرام نہ کہہ“ (اعمال 10:15)۔ اب سب قومیں پاک ہو سکتی ہیں جب وہ خود یسوع کی نئی خوراک سے سیر ہوتی ہیں۔ وہ اُس کی مانند بن جاتی ہیں اور خدا کے بیٹے کی صورت میں ازسرِنو بنائی جاتی ہیں۔ جدائی کی دیوار ڈھا دی گئی ہے۔ اگر کوئی قوم مسیح کے ساتھ پیوستہ ہے تو وہ ناپاک نہیں۔
یہی وجہ ہے کہ عشائے ربّانی پر سب کو کھانے کی دعوت دی جاتی ہے۔ وہ کھانا جو ایک وقت اسرائیل تک محدود تھا، اب قوموں کے لیے کھول دیا گیا ہے۔ مسیح کو اپنی غذا بنانے سے ہم وہی بن جاتے ہیں جو ہم کھاتے ہیں—ہم ویسے ہی مُقدّس بن جاتے ہیں جیسا وہ مُقدّس ہے۔
خود دیکھیں
میری دعا ہے کہ روح القدس آپ کو ایسی آنکھیں دے کہ آپ اُس خدا کو دیکھ سکیں جو اپنے لوگوں کو مکمل، یکجا اور مخصوص ہونے کے لیے بلاتا ہے۔ اور یہ کہ آپ یسوع کو اُس کے طور پر دیکھیں جو لوگوں کو پاک کرتا ہے، اپنی ہی زندگی سے اُنہیں سیر کرتا ہے، اور اُنہیں خدا کی صورت میں تبدیل کر دیتا ہے۔

