کیا ہو رہا ہے؟
داؤد اسرائیل پر حکومت کرنے کے لیے بادشاہ ساؤل سے کہیں زیادہ لائق ہے۔
داؤد خدا کی سنتا ہے۔ وہ صبر اور دعا کے ذریعے ایک کے بعد ایک دشمن کو مات دیتا ہے۔ اُس نے اسرائیل کو متحد کیا ہے اور خدا کے تخت کو قوم کے مرکز میں لے آیا ہے۔ اُس نے اپنے لیے ایک محل بنایا ہے اور اب خدا کے لیے ایک ہیکل بنانا چاہتا ہے (2 سموئیل 7:2)۔
لیکن خدا نہیں چاہتا کہ داؤد اُس کے لیے گھر بنائے؛ خدا داؤد کے لیے ایک خاندانی سلطنت بنانا چاہتا ہے (2 سموئیل 7:5؛ 11ب)۔
اب تک صرف چند ہی وعدے، یا عہد، ہیں جو خدا نے انسانوں کے ساتھ باندھے ہیں: نوح کے ساتھ یہ وعدہ کہ زمین پر پھر کبھی سیلاب نہ آئے گا، ابرہام کے ساتھ یہ وعدہ کہ اُس کی اولاد کے ذریعے دنیا برکت پائے گی، اور موسیٰ کے ساتھ یہ وعدہ کہ خدا اسرائیل کے ساتھ ہوگا اور اُسے ایک وطن دے گا۔ اور 2 سموئیل 7 میں داؤد خدا سے ایک نیا وعدہ اور عہد پاتا ہے۔ داؤد کے بیٹوں میں سے ایک ایسی بادشاہی قائم کرے گا جو کبھی ختم نہ ہوگی (2 سموئیل 7:13)۔
درحقیقت، خدا داؤد کے بیٹے کو اپنا بیٹا کہے گا (2 سموئیل 7:14الف)۔ اور جب خدا کے اِس بیٹے کی تادیب بھی کی جائے گی، تب بھی خدا کی باپ جیسی محبت اُسے کبھی نہ چھوڑے گی (2 سموئیل 7:14ب-15)۔ ہمیشہ قائم رہنے والی بادشاہی کے اِس وعدے سے داؤد دَنگ رہ جاتا ہے (2 سموئیل 7:18)۔ وہ خدا کی مہربانی کے لیے اُس کی عبادت کرتا ہے اور عاجزی سے اِس عہد کو قبول کرتا ہے (2 سموئیل 7:22، 29)۔
پھر داؤد کے ساتھ خدا کا عہد جنگی فتحوں کے ایک سلسلے میں ثابت ہوتا ہے۔ داؤد جنگ کرنے جاتا ہے اور ہر اُس دشمن کو کاٹ ڈالتا ہے جو اُس کی تلوار کے سامنے آتا ہے (2 سموئیل 8:1)۔ یہ اِس لیے نہیں کہ داؤد کوئی خاص باصلاحیت سپہ سالار ہے، بلکہ اِس لیے کہ خدا نے داؤد کو اُس کی ہر فتح عطا کی (2 سموئیل 8:6، 14)۔ داؤد یہ جانتا ہے، اِس لیے وہ جنگ کی ہر لوٹ خدا کے لیے مخصوص کر دیتا ہے (2 سموئیل 8:11)۔
لیکن ایک اَور وجہ بھی ہے جس سے داؤد ایک لائق بادشاہ ہے—وہ اپنے وعدے پورے کرتا ہے۔ اُس نے ساؤل کے بیٹے یونتن سے وعدہ کیا تھا کہ جب اُس کے دشمن مات کھا جائیں گے تو وہ اُس کے گھرانے پر مہربانی کرے گا (1 سموئیل 20:15-16)۔ چنانچہ وہ یونتن کے لنگڑے بیٹے مفیبوست کو لاتا ہے اور اُسے اپنی میز پر یوں بٹھاتا ہے گویا وہ اُس کا اپنا ہی ہو (2 سموئیل 9:1، 11)۔
خوشخبری کہاں ہے؟
2 سموئیل 9 کا اختتام ہمیں داؤد کو اُس کے بہترین روپ میں دکھانا چاہتا ہے۔ وہ ساؤل سے زیادہ لائق ہے۔ وہ خدا کی سنتا ہے۔ خدا نے وعدہ کیا ہے کہ داؤد کا بیٹا ہمیشہ حکومت کرے گا۔ داؤد جنگ میں ہار نہیں سکتا، اور وہ یونتن سے کیا ہوا وعدہ پورا کرتا ہے۔ وہ ساؤل کے پوتے پر رحیم اور فیاض ہے، حالانکہ قدیم زمانے کے بیشتر بادشاہ تخت کے لیے اِس ممکنہ خطرے کو قتل کر دیتے۔
اور اِن سب باتوں میں داؤد یسوع کی ایک تصویر ہے۔ یسوع ہی وہ بیٹا ہے جس کا وعدہ خدا نے داؤد سے کیا تھا (لوقا 1:32)۔ یسوع صرف اِس پر راضی نہیں کہ لنگڑوں کے ساتھ کھانا کھائے؛ وہ اُنہیں شفا دیتا ہے (یوحنا 5:8)۔ ہمارے دشمن ہمیں موت کی دھمکی دیتے ہیں، لیکن یسوع ہر دشمن کو مات دیتا ہے اور صلیب پر اُس ہتھیار، یعنی موت پر، فتح پاتا ہے (1 کرنتھیوں 15:55)۔ یسوع اُس کو پورا کرتا ہے جس کا وعدہ خدا نے داؤد سے اپنے عہد میں کیا تھا۔ وہ ہر طرف سے ہمارے دشمنوں کو مات دیتا ہے اور اُن پر بھی رحیم اور فضل کرنے والا ہے جو اُس کے تخت کے لیے خطرہ ہیں۔ یسوع داؤد کا ابدی بیٹا ہے اور وہ ہمیشہ تک بادشاہی کرتا ہے (مکاشفہ 11:15)۔
ایک ابدی بادشاہ ہمارے لیے بھی اُنہی وجوہات کی بنا پر خوشخبری ہے جن کی بنا پر وہ داؤد اور اسرائیل کے لیے خوشخبری تھا۔ ہمارے پاس ایک ہمیشہ قائم رہنے والا وعدہ ہے کہ عاجز اور کمزور لوگ، جیسے داؤد اور مفیبوست، طاقتوروں کے ہاتھوں کچلے نہ جائیں گے۔ بلکہ ہم خدا کی میز پر بیٹھیں گے اور ہمیشہ کے لیے سلامتی اور قدرت کی بادشاہی کے وارث ہوں گے (متی 5:3-4)۔
خود دیکھیں
روح القدس آپ کی آنکھیں کھولے تاکہ آپ اُس خدا کو دیکھ سکیں جو اپنے لوگوں کے ساتھ وعدے باندھتا ہے۔ اور آپ یسوع کو اپنے ابدی بادشاہ کے طور پر دیکھیں جس نے محبت اور انصاف کی اپنی حکومت اور بادشاہی کا آغاز کر دیا ہے۔

