کیا ہو رہا ہے؟
اسرائیل کے خلاف ہوسیع کی نبوتوں کے اس حصے میں ہم اسرائیل کی روحانی زناکاری کی جڑ تک پہنچتے ہیں۔ خدا سے اسرائیل کی بےوفائی سیاسی نوعیت کی تھی۔
ہوسیع 8: 4 کے مطابق اسرائیل نے ایسے بادشاہ اور سردار مقرر کیے جنہیں خدا نے مقرر نہیں کیا تھا۔ ہوسیع 10: 13 بتاتی ہے کہ وہ اپنی حفاظت کے لیے مصر کے لشکروں کی طرف دیکھتے ہیں۔ وہ سمجھتے ہیں کہ اسور کے ساتھ ایک مہنگا اتحاد اُنہیں اُس کا اگلا نشانہ بننے سے بچا لے گا۔ ہوسیع 8: 9 میں ہم دیکھتے ہیں کہ اسرائیل طاقتور حکومتوں سے فائدہ اُٹھانے کے لیے صرف خدا ہی سے وفاداری پر سمجھوتہ کر رہا ہے۔ اور بظاہر یہ کارگر بھی لگتا ہے۔ اسرائیل میں معاشی خوشحالی ہے، اور لوگ اسے اپنی سیاسی ہوشیاری کا نتیجہ سمجھتے ہیں۔ ہوسیع 10: 1 کے مطابق وہ سوچتے ہیں کہ اُن کے سیاسی اتحادیوں کے جھوٹے معبود اُنہیں بھرپور فصلیں اور پھلدار رحم عطا کر رہے ہیں۔ لیکن ہوسیع 8: 1 میں خدا فرماتا ہے کہ تباہی شکاری پرندے کی طرح اسرائیل پر منڈلا رہی ہے۔ حقیقت یہ ہے کہ اُن کی نافرمانی کے باوجود خدا اُن پر مہربان رہا ہے۔ وہ اُن کی مانند نہیں بلکہ اپنے عہد کا وفادار ہے۔
اسرائیل کو مسئلہ نظر ہی نہیں آتا۔ ہوسیع 8: 2 میں وہ اصرار کرتے ہیں کہ خدا کے ساتھ اُن کا رشتہ برقرار ہے۔ وہ اب بھی وہ تمام عیدیں مناتے اور قربانیاں چڑھاتے ہیں جن کا حکم خدا نے شریعت میں دیا تھا۔ لیکن سچ یہ ہے کہ ہوسیع 9: 1 کے مطابق اسرائیل نے خدا کی شادی کی انگوٹھی تو اپنی اُنگلی میں پہن رکھی ہے مگر وہ غیر مردوں کے ساتھ ہم بستر ہو رہا ہے۔ لوگوں نے سیاست کو خدا کی عبادت کے ساتھ اس قدر اُلجھا دیا ہے کہ اُنہیں اپنے کاموں کی شرمناکی دکھائی ہی نہیں دیتی۔ اُنہوں نے خدا کو اپنے بادشاہ کے طور پر معزول کر دیا ہے، مگر اپنے ضمیر کو تسلی دینے کے لیے مذہبی فرمانبرداری کا ظاہری روپ قائم رکھا ہے۔
چونکہ اسرائیل نے خدا کے ساتھ اپنا ازدواجی رشتہ اس بُری طرح توڑ دیا ہے، اس لیے ہوسیع 9: 11 کے مطابق خدا بھرپور فصلوں اور پھلدار رحموں کی وہ برکتیں واپس لے لے گا جن کا سہرا اسرائیل اپنے سیاسی اتحادیوں کے جھوٹے معبودوں کے سر باندھتا رہا ہے۔ ہوسیع 9: 6 بتاتی ہے کہ جن حکومتوں پر لوگوں نے بھروسا کیا وہی اُن کی تباہی کا سبب بنیں گی۔ ہوسیع 9: 3 کے مطابق جن غیر ملکی طاقتوں کے بارے میں اُن کا خیال تھا کہ وہ اسرائیل کو بچائیں گی، خدا اُنہی کو استعمال کر کے اُنہیں اسیری میں گھسیٹ لے جائے گا۔ اس سے بھی بڑھ کر، ہوسیع 9: 4 میں خدا فرماتا ہے کہ وہ اب اُن کی قربانیاں قبول نہیں کرے گا۔ ہوسیع 10: 2 کے مطابق وہ واحد جگہ جہاں سے وہ مدد پا سکتے تھے، اُن سے چھین لی جائے گی۔ اور ہوسیع 10: 8 بتاتی ہے کہ ایسی مایوسی میں جو موت کی آرزو کرتی ہے، اسرائیل پہاڑوں سے کہے گا کہ ہم پر گر پڑو اور ہمیں کچل دو۔
انجیل کہاں ہے؟
یسوع مسیح کے زمانے میں بھی اسرائیل کو یہی مسئلہ درپیش تھا۔ بعض لوگوں نے، جیسے صدوقیوں نے، روم کے ساتھ گٹھ جوڑ کر کے سیاسی اقتدار حاصل کیا۔ دوسرے، جیسے زیلوتی، خدا کے نام پر رومیوں کے خلاف پُرتشدد بغاوت کا وعدہ کر کے بڑی تعداد میں پیروکار جمع کرتے تھے۔ لوقا 23: 18 - 19 کے مطابق ایسے ہی ایک باغی کا نام برابا تھا۔ یسوع مسیح کی عدالت کے وقت بِھیڑ نے یسوع مسیح کے بجائے اُسے رہا کروانا پسند کیا۔ لوقا 23: 25 ہمیں دکھاتی ہے کہ اُنہوں نے اپنے خدا کے بجائے ایک سیاسی رہنما کو چُنا۔ اُنہوں نے اپنی نجات کے لیے ایک دنیاوی طاقت کو چُنا اور یسوع مسیح کو صلیب پر چڑھانے کے لیے بھیج دیا۔
اس میں کوئی تعجب نہیں کہ لوقا 23: 28 - 30 میں جب یسوع مسیح صلیب کی طرف بڑھ رہا تھا تو اُس نے ماتم کرنے والی عورتوں کے سامنے ہوسیع کے الفاظ دہرائے۔ لوقا 23: 30 کے مطابق وہی تباہی جس کی ہوسیع نے نبوت کی تھی، اُن پر بھی آنے والی ہے۔ دراصل ہر تہذیب اسی خطرے کی زد میں ہے۔ دنیا میں ہر شخص خدا سے بڑھ کر اپنے رہنماؤں، جماعتوں اور فوجوں کی سیاسی طاقت پر بھروسا کرتا ہے۔ اور اسی لیے جلد ہی اُس کا انجام آ جائے گا۔
لیکن خوشخبری یہ ہے کہ یسوع مسیح روم کے لشکروں کی طاقت اور موت کی قدرت کے نیچے سے مُردوں میں سے جی اُٹھا۔ یسوع مسیح نے یروشلیم کی بیٹیوں کو دکھایا کہ اُن سیاسی اور مذہبی طاقتوں پر کیسے غالب آیا جائے جو اُن پر ظلم کر رہی تھیں اور جلد ہی اُنہیں اور بھی زیادہ ستانے والی تھیں۔ یہ بغاوت اور سرکشی میں اُٹھ کھڑے ہونے سے نہیں ہوتا۔ نہ ہی یہ ریاست کی طاقتوں سے اتحاد کرنے اور اُن سے وفاداری کا عہد باندھنے کے ذریعے ہوتا ہے۔ بلکہ اُن کے ہاتھوں جان دینے ہی سے آپ اُن پر فتح پا کر جی اُٹھتے ہیں۔ یسوع مسیح نے اپنی موت اور مُردوں میں سے جی اُٹھنے کے وسیلے سے اُن سب کے لیے راہ مہیا کی جو سیاسی اور روحانی ظلم تلے دُکھ اُٹھاتے ہیں، تاکہ وہ قبر میں سے اُس کے پیچھے چلتے ہوئے دوسری طرف زندگی تک پہنچ جائیں۔
خود دیکھیں
میری دعا ہے کہ روح القدس آپ کی آنکھیں کھولے تاکہ آپ خدا کو اُس بادشاہ کے طور پر دیکھیں جو ہم سے وفاداری کا تقاضا کرتا ہے۔ اور آپ یسوع مسیح کو اُس بادشاہ کے طور پر جان سکیں جس نے اپنی جان دی تاکہ ظاہر کرے کہ اُس سے ہماری وفاداری کبھی بےفائدہ نہیں ہوگی۔

