کیا ہو رہا ہے؟
بڑھتی ہوئی اذیت کے باعث یروشلیم کی کلیسیا کے بہت سے لوگ دوسرے شہروں اور ملکوں میں بھاگ جاتے ہیں (اعمال 8:1)۔ ساؤل، جو مسیحیوں کے خلاف ہونے والے بہت سے تشدد کے پیچھے تھا، اِس مہم پر ہے کہ بھاگے ہوئے ایمانداروں کا سراغ لگائے اور اُنہیں قیدی بنا کر یروشلیم لے آئے (اعمال 9:2)۔
لیکن راستے میں ایک آسمانی نور ساؤل کی اِس بُری مہم میں رکاوٹ ڈال دیتا ہے۔ اُس کا سامنا جی اُٹھے یسوع سے ہوتا ہے (اعمال 9:3)۔ یہ ملاقات اُن لمحوں کی گونج ہے جب خدا پرانے عہدنامے میں ظاہر ہوتا ہے (خروج 19:9، 16)۔ بات صاف ہے—یسوع ہی خداوند ہے۔
ساؤل کا اندھا ہو جانا اُس کے روحانی اندھے پن کی جسمانی تصویر ہے (اعمال 9:8)۔ وہ نہیں دیکھ سکتا کہ یسوع حقیقت میں کون ہے۔ وہ شہر میں داخل ہو کر دوسروں کو نقصان پہنچانے کے اِرادے سے آیا تھا، مگر اب وہ خود ہی مصیبت میں پڑ گیا ہے (اعمال 9:9)۔
خدا حننیاہ نامی ایک مقامی مسیحی کو بُلاتا ہے کہ ساؤل پر ہاتھ رکھ کر اُسے شفا دے، اور اعلان کرتا ہے کہ ساؤل خوشخبری کو قوموں تک پہنچائے گا۔ حننیاہ ساؤل سے ڈرتا ہے، مگر فرمانبرداری کرتا ہے۔ فوراً ساؤل روح القدس سے بھر جاتا ہے، اُس کی بینائی بحال ہوتی ہے، اور وہ بپتسمہ لیتا ہے (اعمال 9:17-18)۔ ابرہام کی طرح خدا ساؤل کو چنتا ہے کہ وہ سب قوموں کے لیے برکت ہو (پیدائش 12:3)۔ خوشخبری یروشلیم، یہودیہ اور سامریہ تک پہنچ چکی تھی—اور اب ساؤل اور دوسروں کے ذریعے یہ زمین کی انتہا تک جائے گی (اعمال 1:8)۔
ساؤل بالکل بدل جاتا ہے۔ وہ خوشخبری کو مٹا دینا چاہتا تھا، مگر اب وہ خود اُس کی منادی کرتا ہے۔ اور عجیب طور پر، اب اُسے اپنی جان بچانے کے لیے یروشلیم کو بھاگنا پڑتا ہے (اعمال 9:20-26)۔ مسیحیوں کو قید کرنے کے بجائے، ساؤل خود مسیح کا قیدی بن گیا ہے۔ اُس کی یہ تبدیلی یہودیہ اور سامریہ کے مسیحیوں کے لیے امن کے ایک دور کا سبب بنتی ہے (اعمال 9:31)۔
خوشخبری کہاں ہے؟
ساؤل میں ہم یسوع کی نیکی اور فضل کو پوری طرح ظاہر ہوتے دیکھتے ہیں۔ خدا کی بھڑکتی ہوئی حضوری ساؤل کو اُس کے سخت دل اور کلیسیا کے خلاف قاتلانہ اِرادے کے سبب ہلاک کر سکتی تھی (گنتی 17:13)، مگر اِس کے بجائے خدا ساؤل کی جان بچاتا ہے اور کلیسیا بڑھتی ہے۔
یہ لمحہ نمایاں کرتا ہے کہ خدا کی قدرت اور فضل ہماری توقعات کو مسلسل اُلٹ دیتے ہیں۔
یہ خوشخبری ہے، کیونکہ اپنے دل کی گہرائی میں ہم بھی حننیاہ کے خوف میں شریک ہیں۔ اُس نے سوچا کہ ساؤل نجات پانے کے لیے بہت بُرا ہے، اِس قدر بُرا کہ خدا اُسے استعمال نہ کر سکے (اعمال 9:13)۔ ہم بھی یہی سمجھتے ہیں کہ کچھ لوگ، تحریکیں اور ادارے خدا یا اُس کی کلیسیا کے ایسے مخالف ہیں کہ خدا اُنہیں بھلائی کے لیے ہرگز استعمال نہیں کر سکتا۔
لیکن خوشخبری ہمیں دکھاتی ہے کہ یہ سچ نہیں۔ خدا نے روم کے بُرے نظام اور فریسیوں کی مغرور تحریک کو استعمال کیا تاکہ یسوع صلیب پر مصلوب ہو۔ مگر وہ صلیب جو یسوع کی موت کے لیے تھی، حقیقت میں ساری دنیا کے لیے زندگی لاتی ہے۔
لیکن جب ہم خود کو ساؤل جیسا محسوس کریں اور سوچیں کہ ہم اِس قدر بُرے ہیں کہ خدا ہمیں نہ بچا سکے اور نہ استعمال کر سکے، تو پھر کیا؟ ساؤل کی کہانی دکھاتی ہے کہ یسوع سے ملاقات ہم میں سے بدترین لوگوں کو لے کر خدا کے چنے ہوئے برتن بنا سکتی ہے (1 تیمتھیس 1:15)۔ یسوع سے ملاقات ایک قاتل کو لے کر زندگی بخشنے والا بنا سکتی ہے۔
ہم سب، خواہ ہمارا پس منظر یا ماضی کچھ بھی ہو، اُسی کام کو جاری رکھنے کے لیے بُلائے گئے ہیں جس کے لیے ساؤل کو بچایا گیا۔ ہم جن کا سامنا یسوع کی خوشخبری سے ہوا ہے، اب روح القدس سے بھرے ہوئے ہیں تاکہ یسوع کا پیغام زمین کی انتہا تک پہنچائیں۔ ہم اِس خوشخبری کے حامل ہیں۔ آپ جو بھی ہوں اور آپ نے جو کچھ بھی کیا ہو، مصلوب اور جی اُٹھے یسوع کا فضل اور قدرت آپ کو بچا سکتی ہے اور خدا کے جلال کے لیے استعمال کر سکتی ہے۔
خود دیکھیں
میری دعا ہے کہ روح القدس آپ کی آنکھیں اُسی طرح کھولے جس طرح اُس نے ساؤل کی آنکھیں کھولیں، تاکہ آپ اُس خدا کو دیکھیں جو روحانی طور پر اندھوں کی بینائی بحال کرتا ہے۔ اور آپ یسوع کو اُس ہستی کے طور پر دیکھیں جو ہمارے ساتھ دُکھ اُٹھاتا ہے تاکہ موت بھی زندگی میں بدل جائے۔

